Íslenska leiðin

Íslenska leiðin  

1. Verðtryggður kreppuvíxill verður sendur á alla sem tóku þátt í góðærinu. Reiknuð verður hlutdeild viðkomandi undanfarin 8-10 ár og tekið tillit til tekna og eigna sem hafa skapast á þessu tímabili ásamt lántökum. Sama verður gert við öll fyrirtæki. Þetta ætti að tryggja  að sakleysingjar, börn og gamalmenni  lendi ekki í greiðslu á því sem það tók ekki þátt í. Einnig ætti þetta að tryggja það að hver og einn borgar það sem hann á skilið hver sem hann er og hvar sem hann hefur aðsetur í nánustu framtíð. Þeir sem sukkuðu taka út timburmennina.

 

1. Hætt verði við að afnema lífeyrisfrumvarpið góða sem Alþingi samþykkti handa sjálfu sér. Þess í stað verði séð til þess að 75% af þessari  greiðslu berist til ríkissjóðs strax aftur til niðurgreiðslu á láni IMF. Seinna þegar skuldir þjóðarinnar hafa verið greiddar og eða orðnar hæfilegar mætti nota þessar greiðslur til ýmissa hjálparstarfa.  Frumvarpið verði aldrei dregið til baka til að áminna okkur um þessa spillingartíma og þá valdsþjófa sem voguðu sér að framkvæma og samþykkja þetta voðaverk um hábjartan dag á Alþingi Íslendinga.

 

1. Þjóðstjórn verði sett strax á laggirnar án fyrrverandi  pólitíkusa, lýðskrumara og  þeirra niðja. Þetta fólk getur ekki unnið saman í dag og þarf því að skipta því út strax, öllu saman. Alveg sama hvað þau segja og telja sig mikilvæg, að ef sú staða kemur upp að þau neita að yfirgefa stólanna sína skulu þáu tekin með valdi og ekið með þau í nokkrum langferðabifreiðum í kirkjugarðinn og þeim bent á að stór hluti íbúa kirkjugarðanna töldu sig ómissandi. Þetta yrði örugglega stórskemmtileg skoðunarferð og best væri að enda skoðunarferðina hjá einhverjum dauðum stórspekingi eins og JS.

 

1. Aflúsa stjórnkerfið, og hreinsa vel.

 

1. Nýr forseti kosinn strax.

 

1. Reglulegt rýni og endurskoðun í þágu almennings á reglum og gildum samfélagsins. Gert af almenningi ekki ef einhverjum forsjáhyggjusinnum.

  

1. Séð verði til þess að allir ráðherrar og alþingismenn sl 10 ára verði hýddir á viðeigandi hátt á opnberum vettvangi fyrir að óvirða Alþingi Íslendinga, þessa virðulegu stofnun til nokkur hundruða ára sem hefur verið virt um allan heim.

 

1. Flokkaskipulag er úrelt og skapar spillingu. Kjósum  persónur, sem hægt er að persónugera. Allir sem fara í framboð skuli fara í sérstök námskeið sem gefi þeim rétt til að fara í framboð. M.a verði þar kennt hvernig og hvenær á að segja af sér, læra að segja satt og fleira er varðar mannleg samskipti. Einnig verða viðkomandi að taka minnispróf og kunna að tala mannamál. Einnig þurfa þeir að sverja eiðstaf um að hagsmunir almennings gangi framar en einkapot, fjölskyldutengs, og vinatengls. Pólitísk skyldleikaræktun í vinnu og úthlutun á störfum innan ríkisstofnana verði stranglega bönnuð sem og önnur hagsmunatengsl.

 

1. Enginn geti verið alþingismaður lengur en 8 ár og sama á við um ráðherra.

 

1. Hæstu laun ríkisstarfsmanns geti ekki verið hærri en sem nemur fjórföldum atvinnuleysisbótum eða lágmarkslaunum verkamanns. Lög verði sett um ofurlaun og þau bönnuð í einkageiranum.

 

1. Fækka ráðherrum og alþingismönnum um helming.

 

1. Allir sem fara í nám á háskólastigi skulu vinna þegnskylduvinnu í 2 ár eftir að námi lýkur hjá einhverrri ríkisstofnun eða fyrirtæki sem hæfir menntun og á lágmarkslaunum verkamanns.

 

1. Gerðar verði styttur af öllum alþingismönnum og ráðherrum undanfarin 10 ár og þeim komið fyrir á leiðinni til Þingvalla á áberandi stað eða meðfram veginum.

 

1. Sambærilegt verður gert með svokallaða  útrásarvíkinga. Hugsanlega mætti setja upp nútíma víkingaþorp, þ.e að í stað víkingaskips kæmi snekkja eða einkaþota o.s.fr. Aðgangur verði gegn vægu verði og þar geti gestir skoðað helstu afrek útrásarvíkinganna t.d hringormaútrásavíkingaaðferðina o.fl.

 

1. Álverin verði þjóðnýtt og ál -afurðir fullunnar hér. Sama á við um allar þjóðarauðlindir að þær skulu vera í eigu þjóðarinnar og ekki seldar úr landi nema einhver virðisaukning hafi átt sér stað hérlendis og tryggt sé að hagnaður skili sér til þjóðarinnar s.s fisk, landbúnað, vatn, rafmagn, olíu.